HUM BHI BIHARI BAN SAKTE !
Nirmam aur nirlajj rajniti ki prateek hain – Mayawati. Rajnitik sankoch aur maan-maryada se sau fisad tauba. “ Ek lajya parityaje – sarvatra lok vijayate” ki adbhut misaal hai—Mayawati chaap siyasat. Abhi toh Mayawati baar-baar noton ki mala pehan rahi hai. Ghinauni rajniti ke ees roop ko dekh samaj ki peshaaniyon per jab vivasta ki silvatein parne lagi toh Mayawati ne nirlajjata ki ek aur haar pehan liya.
Ek tathakathit dalit leader agar noton ki mala pehan , heera jarit aabhusan se susajjit ho , vishaalkaya birth-day cake kaat kar bhooke-nange daliton ki rehnumai karne ka dawa kare kare toh eese na sirf hasyaspad kahenge balki ye kaafi dukhdayi bhi hai.
Sachmuch aaj Bapu ki yaad aati hai. Samaj ki katar ke aakhiri chore per khare bhooke=nagna vyakti ke liye Bapu ne aajeevan langot pehanne ka pran le liya. Aur aaj – five-star siyasatdaan bhookhmari ki kagar per khare awaam ke haq ki baat karte hain. Yeh samaj ka , desh ka durbhagya hai.
Mayawati ki hekdi aur dhakoslapan se dil kafi udaas aur pareshaan tha. Lag raha tha ki ees siyasi nautanki ka koi patakshep nahi. Lekin shaam hote-hote mere niraash man ko ahladit kar diya BIHAR ne.
Patna hawai-adde pe saansad Ajaz Ali ke swagat mein layee gai noton ki mala ko gurbat ke sataye awam ne loot liya. Bihar ki awaam ko ye naagwaar gujara ki tangi , bhookhmari aur gurbat ki sarzameen pe siyasi roti sekne wale ameeri ka hunkaar bhare. Bechare saansad “ bachao-bachao chillate rahe aur janta note loot le gayi.
Kash Uttar Pradesh kid alit janta bhi apne tathakathit raajnetaon ko ye sandesh de paati --- “ hamari garibi ko munh na chirhao varna hum bhi Bihari ban sakte hain”.
